Israel leh Greece-in defence lama thawhdunna tur ziak

Israel leh Greece chuan Pathianni khan defence lama thawhdunna tur inremna an ziak a, hei hi ram pahnihten defence deal an siam tawh zingah lian ber a ni. Israel defence minister Benny Gantz chuan inremna an siam hian Greece nena an inlaichinna tinghetin, economy leh political lama an inzawmna a tihchak phah dawn hle tih a sawi.

Inremna an siam zingah hian Israel defence contractor, Elbit Sytems-in kum 22 chhunga Hellenic Air Force-te tana training centre siamsak leh enkawlna tur, US dollar tluklehdingawn 1.65 hu contract pawh a tel.

He training centre hi Israel flight academy entawna siam a ni dawn a, Italy-a Leonardo siam, M-346 training aircraft 10 dah a ni dawn niin Israel defence ministry chuan a sawi. Elbit hian Greece-a T-6 aircraft upgrade-na tur hmanrua pawh a thawn dawn a, hei bakah hian training a pe dawn bawk a ni.

Israel leh Greece air force-te hian Pathianni khan Greece ramah joint exercise an nei a, March thla khan Israel, Greece leh Cyprus chuan joint naval exercise an lo nei tawh bawk. Kar liam ta Zirtawpni khan Cyprus-ah UAE, Greece, Cyprus leh Israel defence minister-te chuan meeting neiin, kawng hrang hranga thawhdunna ṭha leh nghet zawk siamte an lo remti tawh a ni.