Britain PM-in Brexit tikhawtlai turin ngen

Britain Prime Minister Theresa May-i chuan European Union (EU) hnenah EU aṭanga Britain inlakchhuah hun tur, March 29 chu tihkhawtlai sak turin a ngen.

EU hruaitute leh May-in EU aṭanga an inlakhranna tura Withdrawal Agreement an siam chu UK Parliament chuan vawi hnih a hnawlsak tawh a, hei bakah hian inremna siam loa inlakchhuah an duh lo bawk. Hei vang hian inremna dang siam a nih leh theih nan May-i hian hun a dil belh dawn a ni.

Kum thum kaltaah khan EU aṭanga inlachhuak tur hian Britian hian thutlukna lo siam tawh mah se, inremna siamte an pawm theih loh avangin an chhuah hun tur hi a la chiang thei ta lo a ni. May-i hian kum hnih kalta khan March 29-a EU chhuahsanna tur, Article 50 chu a lo thehlut tawh a ni. Mahse Withdrawal agreement a siam chu hnawlsak a nih vangin Thawhlehni khan European Council Presient Donald Tusk hnenah lehkha thawnin, an chhuah hun tihtlai sak tur hian a ngen ta a ni. Hun eng thleng nge tihtlai sak tura a ngen hi sawichian ni lo mah se, June 30 thleng hun pe turin a ngen nia sawi a ni. Hei hi pawmsak a nih chuan inremna a lo siampui tawh chu siamṭhain, Parliament-ah vote lak turin a pharh leh thei dawn a ni.

Brexit Secretary Steve Barclay chuan March 29 hma chuan Parliament-ah vote lak a ni thei tawh dawn lo niin a sawi. Mahse hetichung hian minister-te chuan ruahmanna siamin, sorkar chuan vote lak leh hi a la tum tho nia a lan thu a sawi.

EU nena inremna siam loa an chhuahsan chuan Britian hian EU single market chu a chhuahsan nghal a ngai dawn a, World Trade Organisation rules hnuaiah awm lehin bungrua thawnchhuah leh lakluhahte chhiah sang zawk pek a ngai dawn a ni.