Thai-Myanmar inkara lei dawh hawng

Thailand Prime Minister Prayut Chan-o-cha leh Myanmar State Counsellor Aung San Suu Kyi-te chuan Thawhlehni khan Thailand leh Myanmar inkara lei dawh pahnihna chu an hawng.

He lei hi Moei lui chungah dawh niin, Thailand-a Tak province-a Moe Sot district leh Myanmar-a Myawaddy inkarah dawh a ni. He lei hi ram pahnihte inkara lei dawh pahnihna a ni.

Lei hawnna inkhawm hi a lei laiah neih a ni a, Thailand PM Prayut chuan lei hi ram pahnihten inzawmna ṭha tak an neih zia lantirtu a ni tih sawiin, an inlaichinna ṭha tak chu chhunzawm zel a ni dawn tih a sawi. He lei hmang hian Mae Sot leh Myawaddy-ah economy lama hmasawnna a thlen tur thu sawiin, transport project dangte nena inzawmna tur kawng a hawng dawn a ni, a ti.

Metre 760-a thui lei dawh hi four lane niin, a siamna senso bath maktaduai thum hi Thailand-in a tum a ni. Ramri-ah ve ve checkpoint siam a ni. Official-te chuan lei siam thar hian ram pahnihte inkara insumdawnna pawh a tihlen phah ngei an beisei thu an sawi.