President Trump-an hrekna khauh zawk siamsakah Venezuela a vau

US President Donald Trump chuan US chuan Venezuela chu hrekna na zawk a siamsak maithei niin a sawi.

White House-a Brazil President Jair Bolsonaro nena joint news conference an neihnaah, President Trump chuan tunhnaia Venezuela ram puma power supply tawp chuan an ramah thil ṭha lo tak a thleng mek tih a lantir niin a sawi a, Venezuela ramin harsatna a tawh mek chu an tihtawp pui vat a ngai a ni, a ti.

Brazil leh US hian Venezuela eptu hruaitu, acting president-a inpuang Juan Guaido chu an thlawp a, ram dang 50 velin Guaido hi an thlawp bawk. Venezuela President Nicolas Maduro thlak tur hian US chuan nawrin, Venezuela oil lakluh kawngah khuahkhirhna a siam a, Maduruo kaihhruai sorkar official eng emaw zat hrekna a lo siam tawh bawk.

Trump chuan a ṭul a nih chuan Venezuela ram hrekna na zawk hi siam a ni dawn tih sawiin, US chuan thil dang zawng aiin Venezuela mipuite dinhmun chu a ngaihtuah a ni, a ti.