New Zealand-in assault leh semi-automatic rifle zawrh khap

New Zealand chuan an rama moque pahniha pawikhawihna rapthlak tak a thlen vanga mi 50 in nunna an chan hnuah, an ram chhungah assault rifle leh semi-automatic rifle a khap.

Prime Minister Jacinda Adern-i chuan nimina press conference a neihah military style semi-automatic (MSSA) leh assault rifle-te chu an ramah khap a ni tih sawiin, hei hi 'gun law' khauh zawk an siamna tura bul ṭanna a nih thu a sawi. PM chuan heng bakah hian MSSA a siam theihna part te pawh khap tel a ni tiha sawi bawk. Adern-i chuan an ram leh mipuite himna tura he khapna hi siam a nih thu sawiin, firfiak pawikhawihna a thlen nawn tawh lohna tura a venna tur a nih thu a sawi.

Adern-i chuan 'gun law' thar chu April 11-ah peih hman beisei a nih thu a sawi bawk. Hemi hma chuan he khapna hi hman a nih tur thu a sawi a, mahse hemi rual hian hian ran vulhtute tan erawh ngaihnathiamna ṭhenkhat siamsak an ni dawn tih a sawi a ni. Assaut leh semi-auto rifle an khap avang hian heng ralthuam khap kawl mekten thuneitute kuta an pek theihna turin a lei letsakna tur scheme pawh siam a ni dawn tih a sawi bawk. Silai lei letsakna tura hian sorkar chuan dollar maktaduai 138 vel zet a sen ngai dawn a, mahse an ram leh mipuite himna tur chuan sum hi an seng mai dawn tih PM chuan a sawi bawk.

PM chuan Christchurch khua-a mosque pahnih beitu chuan ralthuam chu dan ang taka a lei a nih thu leh, online hmangin awlsam takin silai magazine 30 a lei thu a sawi. Police-te chuan mosque beihna-a thi mi 50-te chu tute nge an nih hriatchian vek an ni tawh tih sawiin, an chhungte pawh hriattir an ni vek tawh tih an sawi.

Pawikhawihtu, Australia mi Brenton Tarrant, 28, chu manin tualthah thubuai siamsak a ni tawh a, April 5 hian court-ah hruai a ni leh dawn a, thubuai pawh siambelh sak a ni ang.

Sorkarin rifle khapna thupek a siam hnuah silai eng emaw zat chu MSSA class -ah dah belh an ni. PM Adern-i chuan silai neitu tam tak chu danin a phalsak ang china engkim ti ṭhin an ni tih an hriatthiam rualin, heng mite pawh hian an ram tana ṭha tura sorkar thutlukna siam chu an hriatthiam ngei a beisei thu a sawi.