Tuilian tuarte chhanchhuah hna thawk mek

Cyclone Idai tleh leh tuilian vanga Mozambique rama chhiatna tuartute chhanchhuah hna chu thawh chhunzawm zel a ni.

Mozambique rama thlipui tleh hian ruah a ken tel avangin tui a lian tel a, hmun tam tak tuilian hian chimin tulian lakah an him theih nan mi ṭhenkhat chu an inchungah leh thingkungahte lawnin an tang a ni. Heng mite chhanchhuah hna hi thawh mek niin, mi tam tak chu hmun him lamah hruai an ni tawh.

Kar kalta Ningani khan cyclone Idai hian darkar khata km 170-a chaka tlehin Mozambique-a Beira a nuai a, hemi hnu hian Zimbabwe leh Malawi-ah a tleh zui leh bawk. Thli hian ruah tui a ken tel avangin ruah nasa taka surin tui a lian zui a, mi tam tak an thi a ni.

Thuneitute chuan chhiatna thleng vang hian Mozambique ramah mi 200 vel an thi tawh a, Zimbabwe-ah mi 98 an thi bawk niin an sawi. Mahse hmun tam takah ruang hmuh belh zel a la ni a, Mozambique President Filipe Nyusi chuan thlipui tleh leh tuilianin an rama chhiatna a thlen dante enin thi zat hi 1,000 an tlinchhoh a rinawm thu a sawi. President Nyusi hian national emegency a puang tawh a, Nilaini aṭang khan chhiatna thleng avanga thite sunna hun hman niin, ni thum chhung sun an ni ang.

International Fede-ration of Red Corss leh Red Crescent Societies-te chuan Beira leh a chhehvel bial 90% chu tuilian hian a tichhia niin an sawi a, thingtlang khaw ṭhenkhat chu tuilian hian a chim a ni. Nilaini pawh khan ruh nasa takin a la sur chhunzawm a, hei vang hian chhanchhuah hna pawh thawh chak theih a ni lo.