Afghanistan President thlan hun sawn hla

Aghanistan President thlan hun chu September 28-ah sawn hlat a nih thu Independent Election Commission (IEC) chuan a puang.

President thlan hun tur hi a tirah chuan April 20-ah neih tura tih niin, a hnuah July 20-ah sawn hlat leh a ni. Mahse hei pawh IEC in nikum October thlaa parliament inthlan a la tihfel loh vangin obsever-ten an sawisel a, September thlaah sawn a ni leh ta a ni.

IEC chuan thuchhuah siamin, parliament inthlana vote tlate chu harsatna leh sawiselna hrang hrang a la awm avangin president thlan lo buatsaih hnan chu thil theih a ni lo tih a sawi. Election law ṭha zawka kalpui a nih theih nan te, langtlang zawka inthlan neih a nih theih nan leh voter registration te fel zawka kalpui a nih theih nan president election, provincial council election leh Ghazni province-a parliament election chu September 28-ah neih a ni dawn tih a sawi.

President Ashraf Ghani-a thupuangtu chuan sorkar chuan IEC thutlukna siam chu a zah a, inthlanna felfai tak a awm theihna turin IEC chu ṭha taka thawhpui zel a tum tih a sawi.