Commonwealth member atan Maldives la lut leh

Asia chhim lama awm, Maldives chuan Commonwealth member ni tura a dil leh hnuah, February 1 khan member a ni leh ta. 

Kum 2016, October 13 khan Maldives ram hi Commonwealth member aṭangin a inhnukdawk a, a in hnuhdawh chhan hi human rights record chungchanga fel taka thil ti lo nia puh a nih bakah, president hlui Abdulla Yameen thuneihna hnuaia an ram chhunga buaina awm ṭhin chinfel lam aia en liam mai a tam avangin, democratic reform lamah a tla chhia nia puh a ni bawk. Hei vang hian Commonwealth Ministerial Action Group (CMAG) chuan an mem­ber aṭanga paih turin Maldives ram hi a lo vau tawh nghe nghe. 

Maldives president Ibrahim Mohamed Solih thlan tlin a nih hnu, kum 2018 December thla khan, Commonwealth member ni leh thei turin Commonwealth Sec­retary-General Patricia Scotland hnenah pre­sident Solih chuan dilna a theh lut a ni. An dilna hi pawmsak a nih hnuah Commonwealth member 54-na an ni.

"Commonwealth ram chhungkua kan ni leh theih hi Maldives mipuite tan chuan a lawm­awm hle a ni. Kan ram hi democracy ramte zinga a naupang ber pawl a ni a, democracy ram kan nihna angin mipui rorelna, human rights, mipui chanvo leh dikna, muanna leh thil dang danga hmasawn turin ke kan pe chho zel dawn a ni," tiin president Solih chuan member atana lakluh leh an nih chungchanga a lawm thu a sawi.