New Zealand mosque beihnaa thite sunna hun hmang

Kar kalta Zirtawpni-a New Zealand-a Christchurch khuaa mosque pahnih beihnaa thi, mi 50-te sunna chu nimin khan an ram pumah neih a ni.

Mosque beih zinga pakhat, Al Noor mosque bula Hagley Park-a sunna hun hmang hian mi 20,000 vel zet an pungkhawm a, Prime Minister Jacinda Adern pawh a tel. Mitthite sunnan minute khat chhung ngawi rengin an ding a, hemi hnu hian ṭawngṭaina hun hman zui leh a ni. He sunna hun hman lai hi national media hrang hrangte chuan live-in a tichhuak.

PM Adern-i chuan mipui pungkhawmte hmaah Prophet Muhammad thusawi a sawichhuak a, "I taksa peng pakhat chauhin a tuar pawhin, i taksa pum chuan na a lo tuar a ni" tiin, New Zealand chuan mosque beihnaa thi chhungte chu a tuarpui takzet tih a sawi.

Christchurch-a sunna leh ṭawngṭaina hun hmang tur New Zealand khaw hrang hrang leh ram dang aṭang tein an kalkhawm a ni. An zingah hian Muslim ni lo mi sang tel an tel. Ṭawngṭaina hun hi Iman Gamal Foud chuan a kaihruai a ni.