China-a chemical plant kangah mi 47 thi

China khawchhak lam, Jiangsu province-ah Ningani zan khan chemical plant-ah thil puakin kangmei nasa tak a chhuak zui a, mi 44 an thi a, mi dang 600 chuangin hliam an tuar.

Yancheng khuaa Chenjian-gang Industrial Park-ah Ningani zan khan chhiatna hi a thleng a, kangmei chhuak hi nimin zing dar 3 vel khan an ṭhelhmit thei chauh a ni. Hliam tuarte chu damdawi-in hrang hrangah hruai nghal niin, an zinga mi 32-te chu an dinhmun a ṭha lo hle.

Italy rama zin mek, China President Xi Jinping chuan chhiatna thleng chu pawi a tih thu sawiin, hliam tuarte enkawl hna chu ṭha taka tawk turin a chah. Hei bakah hian chemical plant-a chhiatna thlen chhan chu chhui chiang tura hriattirin, hetiang chhiatna hi a thlen nawn tawh lohna tura hma la turin thuneitute pawh a hriattir nghal bawk.

Chhiatna thlenna plant hi Tiangjiaji Chemical Company ta niin, organic chemical compound 30 chuang an siamna hmun a ni a, a bul vela factory dang pawh kangmei chhuak hian a kangkai tel a ni. Venthawn thilah plant awmna chhehvela cheng mi 1,000 dawn chu hmun him lamah sawnchhuah a ni.