Ban-a'n Myanmar sipai be turin UN hotu a ngen

United Nations secretary-gene­ral hlui Ban Ki-moon chuan Myan­mar rama buaina thleng mekah, Thawh­ṭanni khan amah thlaktu Antonio Guterres chu mi dang kaltlang loa Myanmar sipai hotute be turin a ngen.

Myanmar rama sipai sorkar duh lohna lantir vanga tualchhung buaina leh tharum thawhna thleng mekte tihtawp a nih theihna atan Ban chuan Guterres chu amah ngeiin sipai hotute hi dawr turin a ti a ni.

UN secretary-general Guterres special envoy on Myanmar Christine Schraner Burgener chuan February 1-a sipaiten civil sorkar thuneihna an hnehchhuh hnuah sipaite hi a be tawh a, mahse sipaite hian an rama a kal erawh an phalsak lo.

Thawhṭannia UN Security Coun­cil meeting-ah Ban chuan, "Thil awmdan te thlirin, secretary-general hian amah ngeiin Myanmar sipaite hi a bia a, tharum thawhna nasa zawk thleng tur veng tura a chet a ngai a ni," a ti.

Tun kar Inrinni-a Association of Southeast Asian Nations (ASEAN) member ram 10-ten Indonesia-a summit an neih turah pawh ASEAN ramte hian Myanmar sipai hotu hnenah an rama thil thleng mek din­hmun ram chhung buaina ringawt a ngah ngaih theih a ni lo tih an tihchian a ngai bawk, tiin Ban chuan a sawi.

ASEAN summit neih turah hian Myanmar sipai hotu lu ber, general Min Aung Hlaing chuan a tel tur thu a lo tichiang tawh a ni.