France-in Pakistan-a a diplomat 15 ko haw
France sorkar chuan Pakistan ramah France palai hnawhchhuah phuta nawrh huaihawtnaa tharum thawhna a thlen chhunzawm zel avangin a diplomat 15-te a ko haw.
France ram chanchinbua Prophet Mohammed cartoon tihchhuah a nih chungchangah Pakistan-a Islamist party Tehreek-e-Labbaik Pakistan (TLP) chuan lungawi lohna lantirin buaina an chawk chhuak a, buaina chhuak vang hian mi eng emaw zat an thi tawh a ni. Buaina chhuaka thi zingah hian police pahnih an tel.
Pakistan sorkar chuan TLP in ni thum chhung ram chhung hmun hrang hranga nawrh huaihawtnaa tharum thawhna an thlen avangin kar liam ta Ningani khan an pawl hi dan pawnah a hnawl a ni.
TLP-ten France duh lohna lantira nawrh an huaihawt vang hian France sorkar chuan an ram mi leh sa awmte bakah, company awmte pawh Pakistan chhuahsan turin a lo ti tawh a ni. Thawhṭanni khan diplomat 15-te koh haw an ni bawk a, heng zinga a tam zawk hi secretary leh department head puitute an ni.
France satirical magazine, Charlie Bedo-in Prophet Mohammed cartoon a tihchhuah chungchangah he chanchinbu thlavang hauh zawnga France president Emmanuel Macron kaihhruai sorkarin nikuma thu a sawi avangin Pakistan-a Islamist-te hi an lungawi lo hle. Pakistan prime minister Imran Khan pawhin Charlie Hebdo chanchinbu hi a lo sawisel tawh a ni. He thil vang hian ram pahnihte inlaichinna pawh a ṭha lo chho nia sawi a ni bawk.
Pakistan Parliament chuan an rama France palai awm hnawhchhuah a nih leh nih loh chungchang hi ngaihtuahin vote a la dawn a ni.