Russia eptu hruaitu Navalny damdawi-inah dah
Russia eptu hruaitu, jail-a tang mek Alexei Navalny chu Thawhṭanni khan jail damdawi-inah dah a ni.
European Union leh US chuan Navalny hi jail aṭanga chhuah turin an lo phut fo tawh a, a hriselna dinhmun tlahniam zela damdawi-inah dah a ngaih chungchangah EU chuan Russia sorkar chu mawhphurtuah a puh. US pawhin Navalny hi jail-a a thi a nih chuan Russia chuan a nghawng a tuar ngei ang tiin a lo vau tawh bawk.
Kar thum liam ta aṭang khan Navalny hi a tannaah chaw ngheiin a lo nuar tawh a, a doctor-te chuan a dinhmun a ṭha lo hle a, kal mai thei dinhmunah a ding reng tawh niin kar liam ta kar tawp khan an sawi.
Kum 44 mi, langsar taka Russia president Vladimir Putin sawisel ngamtu, Navalny hi nikum August thla khan nerve agent Novichok hmanga hrai a nih avangin Germany ramah hun rei tak enkawl a lo ni tawh a ni. A dam chian hnuah, kumin January thla Russia ramah a kir a, mahse Moscow a thlen rualin man a ni a, hemi hnu hian a thubuaiah kum hnih leh a chanve tang tura hrem a ni zui bawk.
Navalny hian a tanna hmunah enkawlna a dawng ṭha lo tih sawiin, hnung na bakah a kut leh ke-te a chawmawlh ṭhin nia sawiin damdawia enkawlna pek phutin March 31 aṭang khan chaw a nghei a ni.