Thailand-in inthlanpui nei

Thailand chuan hun rei tak tihkhawtlai a nih hnuin nimin khan inthlanpui neiin mipuiten vote an thlak.

Kum nga kaltaa sipai hotu Prayuth Chan-ocha kaihhruaia sipai chakna hmanga rorellai sorkar paihthlak a nih hnuah inthlan hi buatsaih a la ni lo a, inthlan hun tikhawtlai zel a ni.

An ram huna zing dar 8 aṭangin ramchhung hmun hrang hranga polling station-ah vote thlak ṭan a ni a, tlai dar 5 thleng hawn a ni ang. Inthlan dang aiin kuminah hian vote thlak hun hi darkar hnihin pawhsei a ni. Vote nei mi maktaduai 52 vel an awm a, an zinga maktaduai sarih chu an vote thlak ṭum khatna tur a ni.

Ram danpui siamṭhat hnua inthlanpui an neih hmasak ber a ni a, danpui thar hnuaiah sipaite duhsakna nasa tak pek niin, seat 500 awmna Parliament lower house-ah eng party tan pawh majoirity neih a harsa tawh dawn hle a ni.

Parliament in hniha majority neitu chu prime minister a ni dawn a, hetihlai hian seat 250 awmna Senate member tam zawk chu sipaite ruat a nih avanign Chan-ocha-a dinhmun a siamṭhat phah hle rin a ni.

Inthlanah hian Prime Minister hlui, himna zawnga ramdanga tlanchhe mek Thaksin Shinawatara nena inthlunzawm, Pheu Thai party chu seat la hnem ber tura ngaih a ni. Abhisit Prayuth-a kaihhruai Democrats party chu pahnihna a nih rin a ni a, Prayuth thlawptu Palang Pracharat chu pathumna a nih rin a ni bawk.

Vote thlak hma ni, Inrinni khan Thailand lal King Maha Vajiralongkore chuan thuchhuah siamin, hruaitute tih tur chu mi ṭhaloten thuneihna an chan tur leh buaina chhuak tur lo dan chu a ni, a ti. Hruaitute chuan an ram chu ram nuam leh muanawma an siam theihna turin mipuiten an ṭawiawm ṭhat a ngaih thu a sawi bawk.