Brexit chungchanga mipui ngaihdan lak ṭhat phut

European Union aṭanga Britian inlakchhuah tum chungchangah mipuite ngaihdan lak ṭhat leh phutin Inrinni kahn London-ah mi tam takin kawng an zawh.

Britain sorkarin Brexit kalpui a tum an duh loh thu leh, mipuite ngaihdan la leh phawt tura an phut thu pungkhawmte chuan an sawi a ni. Kum 2016-a mipui ngaihdan lakah khan vote thlaktu zinga 52% chuan EU chhuahsan hi an duh a ni.

London-a kawngzawh huaihawt hi 'Put It To The People' march tih vuah a ni a, People' Vote campaign in a huaihawt a ni. He kawngzawh hi EU-a la awm chhunzawm duh pawl hrang hrang leh MP-te an zawm a, EU ram dang ṭhenkhat aṭang pawhin mi ṭhenkhatin kawngzawha tel tur hian London hi an pan a ni.

EU aṭanga UK inlak chhuahna tur, Article 50 pawh hnawl tura phutna online petition siam a ni a, kar kalta Inrinni khan mi maktaduai li zetin hming an sign tawh a ni.

Ruahmanna siam lawk ang chuan Birtain Parliament-in withdrawal agreement a pawm theih chuan March 29 hian UK hian EU hi a chhuahsan tawh dawn a, mahse a pawm loh chuan April 12 thleng hun pekbelh an ni thung ang.