Khawvela zirtirtu ṭha chawi-mawina Kenya zirtirtu hlan

Kenya ram Rift Valley-a thingtlang khuaa secondary school-a mathematics leh physics zirtirtu, Peter Tabichi chu khawvela zirtirtu ṭha chawimawina, Global Teacher Prize hlan a ni. He chawimawina hian pawisa fai US dollar maktaduai khat a keng tel a ni.

Kar kalta Inrinni khan Dubai-ah Global Teacher Prize hi Peter Tabichi hnenah hlan a ni a, inkhawm hi Hollywood star Hugh Jackman chuan a kaihruai a ni.

Chawimawina dawngtu, kum 36 mi Peter Tabichi hian a hlawh aṭanga 80% chu zirlai rethei zawkte ṭanpuina atan a pe ṭhin. Tabichi chuan chawimawina hlan a ni chu lawmawm a tih thu a sawi a, a zirlai naupangte avanga he dinhmun hi thleng thei a nih thu a sawi. Chawimawina an hlan chuan naupangte tan hun ṭha a pe thei dawn a, khawvel hriatah engkim an ti ve thei tih an lantirna a ni, a ti.

Global Teacher Prize hi Dubai-a Varkey Foundation pek niin, chawimawina hi ṭum nga an pekchhuahna a ni. Tabichi-a inpekna, a thawhrimna leh a zirlaite a rinngamna chu fakawm a tih thu a sawi.

Tabichi hi Pwani thingtlang khuaa Keriko Mixed Day Secondary School-a thawk niin, an zirlai naupang 95% chu chhungkaw rethei tak aṭanga seilian niin, hmun thuma ṭhena hmun khat chu fahrah a ni a, an zinga tam tak chu in lamah pawh ei tur mumal nei lo an ni.