Myanmar activist-ten 'blue shirt' protest huaihawt Sipaite'n civil sorkar aiawhtu NUG a hnawl

Myanmar activist-te chuan nimin khan sipai sorkar duh lohna lantira tel mi eng emaw zat mante chhuah phutin 'blue shirt' protest an huaihawt.

February 1-a sipaiten civil sorkar thuneihna an hnehchhuh hnuah sipai rorelna duh lohna lantirin Myanmar khawpui hrang hrangah nawrh huaihawt reng a ni. Sipaiten hmun tam takah nawrh huaihawtte hi bei letin, sipai kut tuarin mi tam tak an thi tawh.

Sipai rorelna duh lote hian kawng hrang hrangin lungawi lohna an lantir a, nimin khan tangte chhuah phutin kawr pawl hain, an kutah sipaiin an mante hming ṭhenkhatte ziakin lungawi lohna hi an lantir leh a ni.

Kawr pawl an hak hi pro-democracy activist Win Tin zahna an lantirna a ni. Win Tin hi sipaiten kum 19 chhung an tantir hnuah April 21, 2014 khan a thi a ni. Jail aṭanga chhuah a nih hnuah Win hian sipai sorkarin politics kaihhnawih thil avanga a mante zawng zawng chhuah zalen an ni hma chu kawr pawl chauh a ha dawn tiin a intiam a ni.

Myanmar sipai sorkar hian an ram kumthar lawmna pualin kar liam ta khan mi tang eng emaw zat a chhuah a, mahse a chhuahte zingah tunhnaia sipai rorelna duh loa nawrh huaihawt zinga a man khawm zinga tlemte chauh an tel.

Civil sorkar aiawhtu atana din hnawl
Sipaiten civil sorkar thuneihna hnehchhuh hnua Parliament member paihthlak takten civil sorkar aiawhtu atana an din, National Unity Government (NUG) chu sipai sorkar hnuaia home affairs ministry chuan Thawhlehni khan dan loa din tiin a hnawl.

NUG chuan Myanmar mipuiten an aiawhtu atana dik taka a thlan te nia sawiin, sorkarna siam turin thuneihna an nei tih an sawi a, ram dangte pawh NUG chu pawm turin an ngen. Hei bakah hian tunkar Inrinnia Jakarta, Indonesia-a ASEAN summit neih turah pawh NUG aiawh tel tura sawm vek turin an ngen bawk.

ASEAN Parliamentarians for Human Rights chuan summit-a NUG aiawha sawmna hi a thlawp a, "NUG-te berawn lo leh, an thuchhuak te hre loin Myanmar ram chhung dinhmun dik tak hi a sawiho theih lo ang," an ti.

Summit-a tel tura Myanmar sipai hotu, senior general Min Aung Hlaing sawm a nih chungchangah pawh ASEAN chuan Myanmar mipuiten sipai sorkar an pawm loh avangin Myanma ram aiawhtu a ni lo tih an tichiang tur a ni, a ti bawk.

Human Rights Watch pawhin member ram 10 awmna,ASEAN chu summit-a Myanmar sipai hotu tel tura a sawmna chu sut leh turin a phut.

HRW Asia director Brad Adams chuan Min Aung Hlaing hi a kaihhruai sipaite rawng taka chetna leh democracy thlawpa nawrh huaihawtte tharum hmanga beih let an nih avangin ram hrang hrangte hrekna tawk mek a ni a, hei vang hian Myanmar rama chawh chhuah ngei Myanmar ram buaina chungchang saiwhonaah a tel ve tur a ni lo ,a ti.