Queen Elizabeth II piancham lawm lo

Britain ram lalnu, Queen Elizabeth II chu nimin khan kum 95 a tling a, mahse a piancham lawmna erawh buatsaih a ni lo.

Queen Elizabeth pasal, Prince Philip chu kum 99 mi niin April 9 khan a thi a, kar liam ta Inrinni khan vui liam a ni.

Lal chhungkua hian kar hnih chhung Prince Philip hi an sun a, an sun hun hian a la huam avangin Queen Elizabeth hi nimina a pianchamah pawh pawn chhuak loin a awm a,ṭum danga a piancham puala Tower of London leh Hyde park-a gun salute neih ṭhin pawh kuminah chuan neih a ni lo.

Queen hian official birthday hran a nei bawk a, hei hi June thla Inrinni vawi hnihnaah ropui takin lawm a ni ṭhin. Kum 1952 khan Elizabeth hian Britain lal ṭhuthleng a luah ṭan a, tun thlengin he dinhmun hi la chelhin khawvela lal dinhmun chelh rei ber a ni.