Khaukhuap avangin Pakistan-ah national emergency puang

Pakistan-in an ram chhunga an lo, buh leh thlaite eiral ṭhintu khaukhuap vanga harsatna an tawh ziah chungchangah kar kal ta Zirtawpni khan high level meeting neih a ni a, national emergency puan zui a ni.

An lo, buh leh tlai thar chhuah tamna hmun ber Punjab province-ah hian a bik takin khaukhuapte hian lo, buh leh tlaite hi an eichhe nasa hle nia sawi a ni. Hei hian rampum a nghawng pha bawk. Pakistan sorkarin hemi kawnga hmalakna atan pawisa tluklehdingawn 7.3 a ruahman chu National Action Plan (NAP) chuan a pawm nghal bawk.

Kar liam ta khan high level meeting hi Prime Minister Office (PMO)-ah neih a ni a, he meeting-ah hian federal minister-te bakah province pali aṭangin official eng emaw zat an tel bawk. A ṭul anga hma lak dan turte chu province leh district tina thuneitute hnenah hriattir nghal a ni.

Pakistan National Assembly member Nawab Muhammad Yousuf chuan kum 1993 khan an ramin khaukhuap vanga harsatna a tawh thu tarlangin, kha mi ṭum khan ni li chhunga an hmalaknain an harsatna tam tak a sut kian thu a sawi.