Pakistan journalist lar Absar Alam an kap hliam
Pakistan rama journalist hriat hlawh tak, Absar Alam chu Thawhlehni tlai khan Islamabada chenna in bulah silaia kah a ni a, hliam na tak a tuar.
Police-te chuan Alam hi F-11 area-a a chenna in bula park-ah kah a ni tih sawiin, a dulah kah fuh ani a, damdawi-in panpuiin zai nghal a ni tih an sawi. Alam kaptu hi hriat a la ni lo a, police-ten an chhui mek.
Kum 20 chuang journalist hna lo thawk tawh, Alam hi Pakistan-a eletronic media watchdog, Pakistan Electronic Media Regulatory Authority (PEMRA) hotu pawh a lo ni tawh a ni.
Pakistan ram hi journalist-te tana ram hlauhawm ber zinga mi nia sawi a ni a, journalist-te hian beih tawkin chin hriat hriat loha awm zui pawh an awm fo nia sawi a ni.
Kum 2020 khan Pakistan-ah hian a tlem berah journalist 10 thah an ni tih Council of Pakistan Newspaper Editors (CPNE) chuan a sawi. Media rights group Reporters Without Borders chuan Thawhlehni khan ram hrang hranga press mite zalenna neih dan chungchang a tehna, World Press Freedom Index a tihchhuahah pawh Pakistan hi zirchianna an neihna ram 180 zingah 145-na a ni.