Hamas-in Israel nena inkahhai a puang

Israel-in Gaza Strip aṭanga rocket hmanga an ram beihna chhang leta indo thlawhtheihna hmanga Hamas ho hmunte a beih hnuah, Egypt sorkar hmalaknain Israel nen inkahhai an puang tih Gaza Strip-a roreltu, Palestinian pawl Hamas chuan a sawi.

Hamas thupuangtu Fawzi Barhoum chuan Egypt-in Israel leh Hamas-te inkara inkahhai puan a nih theihna tura a hmalakna a chu a hlawhtling ta tih a sawi. Hemi chungchang hi Israel lam chuan a la sawilang lo thung.

Thawhṭanni khan Israel chuan rocket hmanga an ram beihnaa mi parukin hliam an tuar avanga phuba lain Gaza Strip-a Hamas ho hmun a bei a, Hamas military intelligence headquarters a kahchhiatsak niin an sawi. Gaza health ministry chuan Israel beihpui thlaknaah hian Palestinian mi pasarihin hliam an tuar niin a sawi.

Hamas-te chuan Israel chuan Gaza Strip chu awpbeh tumin Palestinian mite hrekna tur kawng hrang hrang a hman chhunzawm reng niin an sawi a, hei vang hian Gaza leh West Bank mipuite laka an chetdanah a nghawng chu an tuar ve tur a ni, an ti. Hamas chuan an mite chu a thlahthlam dawn lo tih sawiin, a ṭul a nih chuan an bei let zel dawn tih an sawi.

Hamas political chief Ismail Haniya chuan Israel beihna chhanglet turin Palestinian mite chu inlungrual turin a sawm. "Palestinian te chu hmun hrang hrang - Jerusalem, West Bank leh Gaza bakah Israel jail chhungah ngeite beih an ni" tiin a sawi a, an ram luahsaktute lakah chuan an inpe dawn lo tih a sawi bawk.

Israel pawhin Gaza Strip a beih hma hian Israel mipuite chu Gaza aṭanga rocket an kahchhuah leh venthawn thilah bomb laka himna tura an siam, bomb shelter-te hawng lawk vek turin a lo hriattir lawk bawk a ni.

United Nations Secretary-General Antonio Guterre chuan tunhnaia Israel leh Gaza Strip inkar boruak chhe chho zel chu an ngaimawh hle tih sawiin, an inbengdai a, boruak ṭha siam turin a ngen tih a sawi.

Kar hmasa khan Gaza Strip aṭang hian Tel Aviv chu rocket hmanga beih a ni a, hei hi kum 2014 hnua Gaza aṭanga Tel Aviv khawpui beih a nih lehna hmasa ber a ni. Hamas chuan mawhphurtu an ni lo tih sawi mah se Israel chuan Gaza aṭanga beihna an tawhah chuan Hamas hi mawhphurtuah a puh vek a ni.