Trump-an Golan Heights Israel rama pawmna nemnghet

US President Donald Trump chuan Syria-a ram inchuh, Golan Height chu Israel rama an pawm thu a puan chu Thawhṭanni khan a hming ziakin a nemnghet.

Israel chuan kum 1967 Six-Day War lai khan Syria kut aṭangin Goland Heights hmun tam zawk chu lain a luahsak nghal a, kum 1981-ah hmundang a lakbelh leh bawk.

President Trump chuan kar kalta Ningani khan a twitter-ah, "Kum 52 zet a nih tawh vangin US chuan Golan Height-a Israel thuneitu a nihna chu a pawmsak a hun tawh a, hei hi Israel ram security atan leh a chhehvel biala boruak ngelnghet a awm theihna tura thil pawimawh a ni", a ti.

Thawhṭanni-a White House-a Israel-in a luah mek, Golan Heights chu Israel rama pawmsakna thu a ziah lai hian Israel Prime Minister Benjamin Netanayahu pawh a awm ve a ni.

Netanyahu chuan President Trump-a thiltih chu lawmawm a tih thu sawiin, Israel chuan a ni anga ṭhian ṭha a nei ngai lo tih a sawi.

Hetihlai hian ram dang emaw zat chuan Trump-a thiltih hi na takin an sawisel a, Syria chuan an ram thuneihna chungchanga inrawlhah puhin, Golan Height chu an ram tia hauhna tura dikna an neih thu a sawi. Palestinian President Mahmoud Abbas leh Hamas-te pawhin an sawisel. Arab League pawhin Trump-an a pawmpui vang ngawtin Golan neitu dinhmun hi a danglam lo tih a sawi bawk.

UN Secretary General Antonio Guterres pawhin Golan status chu ala danglam lo tih a sawi a, Golan chungchanga UN Security Council resolution siam chu hman reng a la ni, a ti. Kum 1981 khan UNSC member 15-te chuan resolution siamin, Israel-in Syria-a a ram luah, Golan Heights ah a dan leh dunte hman a, ro rel a tum chu pawm a ni lo tih sawiin, Israel chu he thutlukna a siam hi sut leh turin an lo ti tawh a ni.