French Muslim pawlin Fb leh YouTube khing

France rama Muslim group chuan March 15-a New Zealand-a Christchurch khuaa mosque pahnih beituin a pawikhawih lai live-a a pekchhuah avang leh a hnu lamah he video hi a darh zui avangin Facebook leh YouTube an khing.

French Council of the Muslim Faith (CFCM) chuan tharum thawhna leh firfiaka chetna, mihring zahawmna palzutna lian tak leh naupangte hmuh atana thil ṭha lo tak en theiha an dah avangin tech giant pahnihte hi an khing tih an sawi. France ramah chuan hetianga thil tih hi kum thum lung-in tan leh euro 75,000 thleng chawi theihna tur a ni.

Christchurch khuaa mosque-a ṭawngṭai laite beitu hian mi 49 a kaphlum a, a pawikhawih lai hi a Facebook-ah live-in a tichhuak a ni. He video hi paih a nih hmain video site dangahte dah a ni hman a, YouTube-ah pawh an dah a ni. Livestream hi minute 17 chhung pek niin, Facebook hian live-a a tichhuah hnu minute 29-ah chauh he video hi a paihsak niin CFCM chuan a sawi. Video hi a lakthlak har avangin a darh nasa hman hle a ni.