ASEAN summit-ah Philippine President tel dawn lo

Association of Southeast Asian Nations (ASEAN) ram hruaituten Myanmar ram dinhmun sawihoa naktuka Jakarta, Indonesia-a summit an neih turah Philippine president Rodrigo Duterte chu a tel vel dawn lo tih a thupuangtu chuan a sawi.

ASEAN summit-ah hian Presi­dent Duterte aiah an ram foreign minister a tel zawk dawn a, President a tel dawn loh chhan hi sawilan a ni lo.

United Nations special envoy Christine Schraner Burgener chu summit-ah hian a tel dawn a, Myanmar ram tualchhung buaina leh thisen chhuahna thleng mek tihtawp a nih theih dan chu South Asia ram hruaitute a sawipui ang.

Thailand prime minister Prayut Chan-o-cha pawh summit-ah hian a tel dawn lo a, a aiah foreign minis­ter Don Pramudwinai a tel ang. PM Prayut a tel theih loh chhan hi sawilan a ni bik lo bawk.

Member 10 awmna, ASEAN member ram dang pariat hruaitute erawh chuan an tel theih tur thu an tichiang tawh. Member-te chu Brunei, Cambodia, Indonesia, Laos, Malaysia, Myanmar, Phili­ppines, Singapore, Thailand, leh Vietnam-te an ni.

Myanmar sipaiten democracy sorkar dah let phuta nawrh huai­hawtte laka beihpui an thlak chhunzawm zel avangin mi 2,50,000 vel chu himna zawngin an tlanchhe tawh niin United Nations rights envoy chuan a tarlang.

February 1-a sipaiten Myanmar civil sorkar an paihthlak duh lohna lantira nawrh huaihawtte zinga mi 738 chu sipaiten an kaphlum tawh a, mi 3,300 vel an man tawh niin monitoring group chuan a sawi.

Nawrh huaihawt chungchang an report avangin reporter 70 vel man an ni tawh bawk a, an zinga 38 chu hren mek an la ni.