Russia-in US embassy-a thawkte hnawt chhuak
US sorkarin Washington-a Russian embassy leh New York-a Russian consulate general-a thawkte a hnawhchhuah hnuah, Russia chuan chhang let vein Moscow-a US embassy-a thawk 10-te chu May 21 hma ngeia an ram chhuahsan turin Nilaini khan a hriattir.
Russia foreign ministry chuan US staff-te hi Russia ram chhuahsan tura hriattirin, hei hi awmze nei loa US sorkar hmalakna a thungrulhna tih a sawi bawk. April 16-a US in Russia hrekna a siam chungchangah a ṭul anga hma lak zel an tum thu a sawi bawk a ni.
Eptu hruaitu Navalny thlawptu 1,700 chuang man
Nilaini vek khan Russia ram khawpui hrang hrangah eptu hruaitu man, Alexei Navalny thlawptute chuan kawng an zawh a, kawng zawh zingah mi 1,700 chuang man an ni. Man zingah hian Navalny thupuangtu Kira Yarmush leh a thawhpui Luobov Soboi-te an tel.
Navalny hi jail-a a tan hnuah a hriselna a ṭha tawk lo hle a, mahse damdawi lam enkawlna ṭha pek a ni lo tih sawiin, enkawlna ṭha zawk pek phutin chaw ngheiin a nuar mek a ni. Moscow-a kawngzawhte chuan Navalny chhuah zalen tura an phut thu leh, jail-a amah enkawltu tur doctor tir tura an phut thu an aupui. Kawngzawhnaah hian Navalny nupui, Yulia pawh a tel.
Hetih lai hian Russia sorkar chuan Navalny chu tang dangte ang bawka enkawlna pek a ni tih sawiin, state human rights commissioner Tatayna Moskalkova chuan Thawhlehni khan doctor paliin Navalny hi an tlawh a, harsatna lian tham an nei lo tih an sawi niin a tarlang.
US leh EU chuan Navalny hi chhuah tur leh enkawlna ṭha zawk pe turin Russia sorkar an lo phut tawh a, US chuan jail-a a thi a nih chuan Russia chu a man a tuar ang tiin a lo vau tawh bawk.