England-ah lockdown puang leh

United Kingdom (UK) prime minister Boris Johnson chuan England-ah Covid-19 hri kai maktaduai khat chuang an awm tawh avangin kar li chhung awh tur lockdown a puang leh. 

October 31 khan Johnson chuan TV kaltlangin an ramin Covid-19 dona kawnga hmalakna a neih chung chang a sawi a, he hunah hian Johnson chuan an ramah hri kai mtd khat chuang an awm tawh thu sawiin, hri leng do dan tur dang a awm loh avangin lockdown puan a ngaih ngei ngei thu a sawi. 

Lockdown hi tun kar Ningani (October 5) aṭangin December 2 thleng hman a ni dawn tih Johnson chuan a sawi a, he hun chhung hian inlama tawmim hram hram turin mipuite a chah a ni. In lam aṭanga hna thawk thei lo, zirna lama hnathawh ngaite, medical thila hnathawk tura chhuah ngaite leh mamawh chakkhai thil leia chhuah ngaite lo chu tumah pawn chhuak lo turin Johnson chuan England mipuite a ngen. 

Pub, bar, gym, biakin leh restaurant-te chu khar tur a ni a, mahse delivery erawh an ti thei thung ang. School, college leh university erawh chu hawn chhunzawm a ni dawn. 

March thlaa England-a lock­down ai chuan tuna lockdown kalpui dan tur chu a danglam dawn tih sawiin, Johnson chuan lockdown puan hmasakah kha chuan in khuahkhirhna khauh tak hman a ni a, tunah erawh chuan hriatthiamna tam tak nena lockdown hi kalpui a ni dawn tih a sawi a ni. 

PM chuan krismas chung­chang pawh sawi chhuakin, kumina kristmas chu kumdang aiin a danglam hle dawn a ni, a ti. Ningani aṭanga lockdown an hman ṭan tur hi zawm ṭhat a nih chuan hri leng chu a ziaawm chhoh mai a rin thu Johnson chuan sawiin, krismas-ah chuan chhungkhat lainate an inhmuhkhawm theih a rin thu a sawi bawk. 

England hi Europe ram zinga Covid-19 vanga thi tamna ber ram a ni mek a, March 23 khan UK pumpuiah lockdown puan a lo ni tawh a ni. England bakah hian Europe ram hrang hrangah chuan Covid-19 hri leng thawh hnihna a thleng chho leh mek a, hei vang hian France leh Germany pawhin kar liam ta khan lockdown an lo puang ve tawh bawk.

UK-a Covid-19 hri kai tawh zat hi nimin thleng kha chuan mi 10,11,660 an awm a, heng zinga mi 46,555 chuan hripui hi an thihpui tawh a ni.