US House-in Trump veto hnawl zo lo

Democratic party lam chakna, US House of Representatives chuan President Donald Trump-a veto hnawlsak tura vote an lakah, vote hmuh ngai zat member hmun thuma ṭhena hmun hnih thlawpna a hmu zo lo. Hei vang hian President Trump chuan Congress-in a pawmpui bakah an ram chhimthlang lama ramri hungna bang siamna turin sum a hman belh thei dawn a ni.

Trump vote hnawlsak tura vote lakah member 248 in a thlawp lamah an vote laiin a duh lo lamah vote 181 a tla. Vote hmun thuma ṭhena hmun hnih nei tur hian member 286 thlawpna an neih a ngai a, mahse hei hi vote 38 in an pha ta lo a ni.

President Trump hian Mexico ramri hungna bang siamna tura a sum phut ang chu Congress in a pawmpui theih loh vangin kawng dang aṭanga sum pawhpen a nih theihna turin national emergency hi a puang a ni. Hei hi Democrats lam chuan nasa taka sawiselin, dik lo taka president thuneihna hmangahte an puh a ni.

Thawhṭanni khan acting Secretary of Defence Patrick Shanahan chuan ramri bang siamna tur hian Department of Defence chuan military construction project dang aṭangin dollar tluklehdingawn khat a pek tur thu a lo sawi tawh a ni. Hetihlai hian Democratic Representative Adam Smith, Armed Services Committe chairman chuan panel chuan Petagon fund hman tumna chu a pawm lo tih a sawi thung.

Smith chuan committee-in Pentagon budget hearing a neihnaah hei hi sawiin, Department of Defence fund hman chu committee chuan a remti lo tih a sawi. Hei bakah hian Trump-an defence budget-a dollar tld. 750 dah a rawtna pawh pass a ni lo ang, tih a sawi bawk.