Pakistan PM hlui Sharif-a bail-in chhuah tir

Pakistan Prime Minister hlui Nawaz Sharif-a chu a dam ṭhat loh avangin Supreme Court-in kar ruk chhung bail-a chhuah a phalsak hnuah nimin zingah khan jail aṭangin chhuahtir a ni.

Thawhlehni khan Chief Justice of Pakistan Asif Saeed Khosa kaihruai judge pathum awmna bench chuan Sharif-an bail-a chhuah a dilna chu ngaihtuahin an phalsak a, Sharif-a chu Pakistan ramchhunga damdawi-in a duh bera medical treatment a lak an phalsak. Hemi rual hian Pakistan a chhuahsan erawh khap a ni thung.

PM hlui hi jail aṭanga a chhuah hian a party, Pakistan Muslim League-Nawaz (PML-N) hruaitute leh a chhungten an lo hmuak a ni.

Sharif leh a chhungte hi eiruk thubuai pathum- Avenfield properties, Flagship investment leh Al-Azizia steel mills chungchangah siamsak an ni a, kum 2017 khan Panama Papers case avangin PM a nihna aṭangin Supreme Court chuan a lo ban tawh bawk.

Nikum July thla khan Avenfield corruption case-ah hian kum 10 tang tura hrem a ni a, September thla khan bail-a chhuah tir a ni. Mahse December thla khan accountability court chuan Al-Azizia eiruk thubuaia thiam loh a chantir leh a, Flagship corruption case-ah erawh chuan thiam a chang thung.