Golan Heights chungchang vangin UN-ah US sawisel
United States chuan Syria-a Israel-in a ram luah, Golan Heights bial neituah Israel a pawm thu sawi a, a pawmna nemnghehna tura President Donald Trump-an a hming a ziah hnan chungchang chu Nilaini-a UN Security Council meeting-ah na taka sawisel a ni.
UNSC meeting hi Syria ngenna angin neih a ni a, council hnena ngenna a thlenah Syria chuan US thiltih dan chu UN resolution leh international law palzutna lian tak a ni, a ti.
President Donald Trump chuan Thawhṭanni khan Israel Prime Minister Benjamin Netanyahu awm laiin Israel in kum 1967-a a ram lak leh a luahzui tak Golan Heights hi Israel rama a pawm thu a puan tawh chu ziakin a nemnghet a ni.
Council meeting-ah hian member ramte chuan Israel-in Golan Heights a luahsak leh thuneihna a chuh chu an dem thu sawiin, he hmuna thuneitute zawk chu Syria zawk a ni tih an sawi. South Africa UN ambassador JerryMatjila chuan US thiltih dan chuan Middle East-a hun rei tak remna leh muanna a awm theihna tura hmalakna kawngah eng kawng mahin a pui dawn lo a ni, a ti. Syria ram ṭhianṭha, Russia pawhin ram hrang hrang sorkarte hnenah Golan Heights chu Israel ram ni loin, Israel-in midang ram a luahsak anga ngai chhunzawm zel turin a ngen. France pawhin international law palzut tumte chu an hlawhtling ngai lo tih a sawi bawk.
Syria rama khawpui hrang hrangah Golan Heights chungchanga US thutlukna siam duh lohna an lantir a, Syrian leh Palestinian flag-te kengin Golan chu Syria ta a ni tih thuziakte an keng bawk. Information Minister Imad Sara chuan kawngzawhte hnenah US thiltih dan chu na taka chhang let turin Damascus-a kawngzawhte chu a fuih.
Mahse US chuan a thiltih hi Israel security tichakna atan leh, Middel East puma boruak ngelnghet zawk a awm theihna tura thil ṭangkai a ni dawn tih sawiin, Syria leh a thurualpui Iran-te chetdan chu an chik reng thei dawn tih a sawi. US diplomat Rodney Hunter chuan Golan-a thuneihna Syria kuta dah chu Syria ram khawpui leh Iran bakah an thurualpui Hezbollah firfiak-te hlauhawmzia hriat loh derna ang mai a ni dawn tih sawiin, anni hian Israel beihna atan Golan Heights bial chu hman an duh a ni, a ti.