UK PM-in Brexil deal pawm chuan PM aṭanga ban tiam

Britain Prime Minister Theresa May-i chuan European Union aṭanga Britain inlakchhuahna tura inremna a siam chu Parliament-in a pawmpui chuan prime minister a nihna aṭanga a ban tur thu a sawi.

May-i leh EU hruaituten Withdrawal agreement an siam chu Parliament-ah ṭum hnih an lo hnawlsak tawh a ni.

Nilaini khan May-i hian a party, Conservative party legislator-te chu meeting neihpuiin, Parliament-ah a ṭum thumna atana Brexit deal chungchanga vote an lak leh hunah pass a nih chuan a bang dawn tih a hrilh a ni. PM chuan, "He inremna hi kan pawm a, Brexit hi a taka kan kalpui a ngai a ni", a ti. Ram leh party tana ṭha tur a nih chuan a ruahman lawk aia hma pawhin a hna chu bansan a inhuam thu a sawi bawk.

Ruahmanna an siam lawk ang chuan Britain hian March 29-ah EU hi a chhuahsan dawn a, mahse an chhuah dan tura inremna an siam hi Parliament-ah hnawl a nih zel avangin April 12 thleng pawhsei sak an ni. April 12 hmaa inremna hi an pawm theih chuan May 22-ah European bloc hi an chhuahsan thei dawn a ni.

PM May-i hian a chawlh hun tur hi la sawichiang lo mah se May 22-ah a thlaktu tur hi thlan rin a ni a, party lamin an la tichiang ang.