ASEAN summit-a Myanmar civil sorkar hruaitute tel tir phut

Southeast Asian non-govermental organisation (NGO) 45-te chuan vawiina Jakarta, Indonesia-a neih tur Association of Southeast Asian Nations (ASEAN) summit-ah Myanmar civil sorkar paihthlak taka hruaitute tel tir ve turin an phut.

NGO intelkhawmte chuan social media lamah thuchhuah siamin, Myanmar ram mipuite an aiawhtu atana an thlan chhuahte tel loin, ASEAN ram hruaitute chuan Myanmar tualchhung buaina thleng mek chu an chingfel thei lo ang, an ti.

Summit-a tel tura Myanmar sipai hotu lu ber, general Min Aung Hlaing sawm a ni chu an ram mipui duhdan kalh a ni tih an sawi bawk.

February 1-a sipai chakna hmanga Myanmar civil sorkar paihthlak a nih hnuah mipuiten sipai rorelna duh lohna lantirin khawpui hrang hrangah nawrh an la huaihawt chhunzawm reng a ni. Sipaite chuan democracy thlawptu nawrh huaihawtte hi bei letin, an zinga 700 chuang chu an kaphlum tawh a, mi 3,000 chuang an man tawh bawk a ni.

Vawiina ASEAN summit neih tur hi Myanmar tualchhung buaina leh a chinfel dan ngaihtuaha international meeting neih hmasa ber tur a ni. Hetih lai hian ASEAN hi member ramte ramchhung inrelbawlna chungchangah an inrawlh ngai lem lo a, vawiina meeting-ah hian eng ang thutlukna nge an siam dawn tihin ngaihven a hlawh nghal hle.

ASEAN member ramte chu - Myanmar, Brunei, Cambodia, Indonesia, Laos, Malaysia, the Philippines, Singa­pore, Thailand leh Vietnam an ni.

Myanmar sipai sorkar thlawptu nia puh, China chuan summit hian Myanmar ram buaina chinfelna tur kawng a hawn ngei a beisei thu a sawi. China hi ASEAN member a ni lo a, mahse ASEAN Plus Three group-ah Japan leh South Korea nen an tel a, vawiina Jakarta-a summit neih turah hian an tel dawn leh dawn lo a chiang lo.

Mi mtd 3.4 ei tur nei loin awm dawn
World Food Programme chuan Maynmar rama Covid-19 hri len vang leh sipai rorelna duh lohna lantira tualchhung buaina thleng mek avangin mi tam takin ei leh in lamah harsatna an tawk mek tih sawiin, thla ruk hnuah chuan mi maktaduai 3.4 vel chu ei tur nei loin an awm mai dawn niin a sawi.

WFP Myanmar country director Stephen Anderson chuan mi tam takin an hna an chan tawh a, ei tur leina nei mumal loin an awm tawh a ni, tiin thla ruk hnuah, a bikin urban centre-a awm tam tak chu ei tur nei loin an awm dawn a ni, a ti. Ei leh in lama mipuite harsatna tawh mek chungchangah rang takah hma lak a ngaih thu a sawi bawk.