Venezuela eptu hruaitu kum 15 chhung politics khelh khapsak

Venezuela sorkar chuan eptu hruaitu Juan Guaido chu kum 15 chhung atan politics a khelh khapsak a nih thu a sawi a, mahse National Assembly hruaitu hian President Nicolas Maduro paihthlak tuma a campaign chu a kalpui chhunzawm zel dawn tih a sawi.

State Comptroller Elvis Amoroso, President Maduro-a thawhpui hnai tak chuan he thupek hi Ningani khan TV-ah puangin, Guaido financial record-ah thil dik tawk lo a awm niin a sawi. Mahse hei hi US leh a thurualpui ramten an thlawp, eptute hmalakna danbeh tura Venezuela sorkarin a beih letnaah ngaih a ni thung.

Guaido hi kum 2015 khan National Assembly-ah hian thlan tlin a ni a, kumin January thla khan Assembly leader-ah ruat a ni. Zinchhuahna tura an sum hman theih tura ruahman dollar 94,000 bakah ṭum 90 zet ram pawn lamah a zinchhuak hman niin Amoroso chuan a sawi. Eptu hruaitu chu ram dang sorkar te a thlunzawm avang leh, an hnen aṭanga thilpek a dawn avangin Venezuela tana thil pawi tak a ti niin a puh.

Hetihlai hian Guaido chuan kawtthlerah nawrh an huaihawt chu an chhunzawm zel dawn tih a sawi a, comptroller-in a chungchang a sawi chu thu dik lo nia sawiin, Maduro-a kaihhruai sorkar chu dan kalha ding niin a puh zawk a ni.

Guaido-a thupuangtu Edward Rodriquez pawhin Guaido chungchanga khapna thupek chu judiciary lam chauhin an siam theih a ni tih sawiin, sorkar lamin an lo puan ve ngawt chu awmze nei lo a ni, a ti. Venezuela sorkar hian kum 2017 khan eptu hruaitu hlui, Henrique Capriles chu politics khelh a lo khapsak tawh bawk.

Guaido hian kumin January thla khan nikum May thlaa an ram inthlanpuia Maduro thlan tlin a nih dan chu dan kalh a ni tih sawiin, amah zawk chu an ram hruaitu dik tawk a ni tih a sawi a, acting president-ah a inpuang a ni. US leh khawthlang ram tam zawk chuan Guaido hi Venezuela ram hruaituah an pawm a, hetihlai hian China leh Russia chuan Maduro hi an thlawp thung.