UN hotuin ram hruaitute rua-hmanna ṭha tak nei vek turin ngen

United Nations Secretary-General Antonio Guterres chuan climate summit an neih turah ram hrang hrang hruaitute chu ruahmanna fel fai tak nei chunga kal vek turin a ngen.

UN hotu chuan September 23 hian 'Climate Action Summit' a ko tih sawiin, he hunah hian ram hruaitute chu thu sawi ringawt tur ni lo, hmalakna tura ruahmanna fel fai tak nei tel vek turin a ti a ni.

Ningani khan World Meteorological Organization (WMO) chuan 'The State of the Global Climate' report a tichhuak a, khawvel ram hrang hranga sik leh sa inthlak danglam nasain mihringah leh socio-economics lama nghawng ṭha tak a thlen dan hrang hrangte a tarlang a ni.

Kum 2018 khan leilung chhiatna thleng chu mi maktaduai 62 velin an tuar a, heng chhiatna thleng tam zawk hi chu khaw chin inthlak danglam nasa lutukin a thlen a ni. Tuilian chu harsatna thlentu lian ber niin ṭum 281 vel zet tuilian thleng chuan mi maktaduai 35 te a nghawng niin Centre for Research on the Epidemiology of Disasters (CRED) leh UN International Strategy for Disaster Risk Reduction chuan a sawi. Kum 2018 chhunga chhiatna thleng tam ber chu khawkheng, tuilian leh thlipui tleh vanga thleng te an ni.