ASEAN-in Myanmar-a tharum thawhna titawp turin phut

Indonesia khawpui, Jakarta-a Inrinnia Association of Southeast Asian Nations (ASEAN) ram hruaituten summit an neihah, Myanmar ram tualchhung buaina tawh mekah, tharum thawhna thlengte titawp nghal tura an phut thu an sawi.

Member ram 10 awmna, ASEAN chuan Myanmar chung chang ngaihtuahin emergency summit hi a ko a, Myanmar ram buaina tihtawp a nih theihna tura an thil phut panga an siam a ni. He meeting-ah hian Myanmar sipai hotu lu ber senior general Min Aung Hlaing pawh a tel.

Myanmar sipaiten February 1-a civil sorkar thuneihna an hnehchhuh avanga tualchhung buaina thleng mek chu titawp tura an duh thu ASEAN ramte chuan an sawi a, mipuite leh sipaite pawh boruak ṭha a awm theihna atana theihtawpa inthunun tura an duh thu an sawi.

Buaina chinfelna tura inbiak­na nei tura an duh thu sawiin, ASEAN chairman special envoy chuan inbiakna kalpui dan tur hi a buaipui dawn a, ASEAN secretary-general-in a pui dawn bawk a ni, an ti.

Tualchhung buaina thlen avanga harsatna tawk mipuite chhawmdawlna pek an ni dawn tih sawiin, special envoy leh palaite chuan Myanmar ram tlawhin, pawl hrang hrangte an hmu dawn tih an sawi bawk.

Jakarta-a ASEAN summit neihna bulah hian Myanmar sipai rorelna duh lotute mi ṭhenkhat chuan nawrh an huai­hawt a, Myanmar rama demo­cracy tundin leh sipai rorelna an duh lohna thuziakte an keng. Myanmar ram khawpui hrang hrangah pawh mipuite'n nawrh an huaihawt bawk.

Myanmar sipaite civil sorkar an paihthlak hnuah, Parliament member-ten civil sorkar aiawhtu atana an din thar, National Unity Government (NUG) chuan ASEAN hruaitute thutlukna siam chu lawmawm an tih thu an sawi a, Myanmar ramchhung buaina thleng mek chinfelna tura thutlukna a siamte chu chak taka a taka a kalpui zui an beisei thu an sawi.

Hetih lai hian Myanmar activist-te chuan an ram sipai hotu leh ASEAN ram hruaitute inremna siam a, tualchhung buaina thleng mek tihtawp tura an phut chungchang chu na takin an sawisel a, nawrh huaihawt chhunzawm zel an tum tih an sawi.

Protest group, General Strikes Collaboration Committee hotu Khin Sandar chuan, "ASEAN emaw UN emaw pawh ni se, pawn lam aṭangin inbei tawh loin inbiakna hmangin buaina chu chingfel rawh u tiin an sawi ringawt ṭhin. Hei hian Myanmar ramchhung thil thleng mek dinhmun dik tak a tichiang lo. Ruahmanna kan siam a, lungawi lohna hi kan la lantir zel dawn a ni," a ti. ASEAN meeting-a an thu relte chu Myanmar ram mipuite thil duh a tilang lo a ni tiin, sipai rorelna chu tihtawp a nih hma chuan theihtawpa an nawr zel tur thu an sawi a ni.