Myanmar activist-ten Non-cooperation campaign kalpui

Myanmar sipai rorelna duh lotute chuan kawng hrang hrangin lungawi lohna an lantir chhunzawm zel a, nimin aṭang khan activist-te chuan non-cooperation campaign an kalpui ṭan leh.

Activist-te chuan sipai sorkar duh lohna lantir nan mipuite chu electric bill pe lo tur leh, agricultural loan rulhna te pawh pe tawh lo turin an ti. Naupangte pawh school kal tir lo turin an ti bawk.

Kar liam ta Inrinni-a Jakata, Indonesia-a Association of Southeast Asian Nations (ASEAN) summit-a Myanmar chungchanga inremna an siam chu na takin an sawisel. He summit-ah hian Myanmar sipai hotu lu ber, senior general Min Aung Hlaing pawh a tel a ni.

Activist-te chuan February 1-a sipaiten civil sorkar thuneihna an hnehchhuh aṭang khan sipaite kut tuarin lungawi lohna lantira nawrh huaihawt zinga mi 751 an thi tawh niin an sawi. Democracy thlawptute chu nimin khan khawpui hrang hrangah nawrh an huaihawt chhunzawm leh nghal a, mahse buaina lian tham chhuak erawh a awm lo nia hriat a ni.

Suu Kyi-i thubuai ngaihtuah
Sipaiten an hren mek, civil sorkar hotu Aung Sang Suu Kyi-i thubuai chu nimin khan ngaihtuah a ni.

Suu Kyi hi video link hmangin a thubuai ngaihtuahnaah hian a inlan a, a hmaa a lo ngen tawh ang bawkin court hnena hian a lawyer-te chu hmaichhana a hmuh phalsak turin a ngen leh. Court chuan a ngenna hi thuneitu sang hnenah an lo thlensak tur thu an hrilh. Man a nih hnuah Suu Kyi hi hmaichhana a lawyer-te hmuh phalsak a ni lo a, video link hmang chauhin an inbe thei a ni.

Suu Kyi hi sipai sorkar chuan thubuai hrang hrang a siam sak a, heng zingah hian colonial eral official secret act palzuta puhna pawh a tel. He thubuai bikah hian thiam loh chantir a nih chuan kum 14 thleng lung-in tan tir theih a ni ang.

Suu Kyi-i lawyer-te chuan sipaiten thubuai an siamsak chu thu dik behchhan ni lo, an siamchawp mai niin an sawi. May 10-ah thubuai hi ngaihtuah chhunzawm leh a ni ang.