Jerusalem-a Palestinian-te beihna titawp turin ngen
Jordan leh Egypt ram chuan Pathianni khan Israel sorkar hnenah Jerusalem Old City-a Israel extremist group-ten Palestinian mite an beih ṭhin chu titawp turin an ngen.
Jordan foreign minister Ayman Safadi leh Egypt foreign minister Sameh Shoukry-te chu Pathianni khan tun hnaia Jerusalem-a thil thleng chungchang an sawidun a, inbeihna thleng ṭhin tihtawp leh boruak ṭha leh muanawm a awm theihna atana hma lak a ṭul thute an sawidun a ni.
Minister pahnihte hian international law hnuaiah Palestinian mite himna pek chu Israel sorkar mawhphurhna a ni tiin, he a mawhphurhna hi pawl leh ram hrang hrangten Israel an hriattir a, an nawr fo a ngai tih an sawi.
Kar liam ta Ningani khan East Jerusalem-a Damascus Gate bulah Ramadan hmang tura pungkhawm, Palestinian-te leh Jewish activist-te an intibuai a ni. He buaina chhuakah hian Palestinian 100 velin hliam an tuar nia sawi a ni bawk. Zirptawni zan khan buaina hi chhuak nawn lehin, Palestinian ṭhalai eng emaw zat chu pungkhawm lehin Israel police-te nen an intibuai leh a ni.
Palestinian-te hian lungin police-te hi an tawng a, Israel court building pawh beiin security camera-te an tihchhia. Police-te hian hnawh darh tumin pungkhawmte hi tuiin an phuh bawk. He buaina chhuakah hian Palestinian pariatin hliam an tuar niin Palestine Red Crescent chuan a tarlang.