US-in Covid-19 Vaccine Dose mtd 60 ram dangah thawn phal
United States chuan AstraZeneca Covid-19 vaccine dose maktaduai 60 chu ram dangah thawnchhuah a phal dawn tih White House senior Covid-19 adviser Andy Slavitt chuan a sawi.
President Joe Biden kaihhruai sorkar chuan March thla khan Covid-19 vaccine dose maktaduai li chu Canada leh Mexico hnenah thawn a ni dawn tih a lo sawi tawh a, mahse ram dangah hri lengin zual lam a pan chhoh leh avangin heng ram pahnihah chauh ni lo thawn chhuak tura nawrna a nasa hle. Hemi hnu hian dose maktaduai 60 chu ram dangah thawnchhuah a phalsak dawn tih a sawi a, thla reilotea thawnchhuah theih a ni ang.
White House thupuangtu Jen Psaki chuan vaccine-te hi ram danga thawnchhuah an nih hmian Food and Drug Administration (FDA) official-te chuan an endik leh vek dawn tih a sawi. FDA hian a hmain vaccine pathum - Prizer BioNTech, Moderna leh Johnso & Johnson (Janssen) siam a lo pawm tawh a ni.
Mithiamte chuan heng vaccine pathumte hian an ram mamawh a phuhru thei dawn nia an ngaih thu leh, AstraZeneca vaccine hi hman tel ve a ngai kher lo maithei niin an sawi.
Vaccine dose hnihna la chhunzawm lo an pung
US-ah hian vaccine pek chhunzawm zel a ni a, data thar berah chuan Covid-19 vaccine dose khatna hi an rama puitling chin 53% in a la tawh a ni. Hetih lai hian dose khatna la tawh, dose hnihna la chhunzawm lo hi 8% an awm.
March thla khan vaccine dose hnihna la chhunzawm duh lo hi 3.4% an ni a, mahse April thlaah chuan a let aia tamin an pung a ni.
US-a vaccine hman mek, Pfizer leh Moderna vaccine late hi a dose khatna an lak ṭanga kar thum/ li hnuah dose hnihna lak tur a ni. Vaccine hian a hna thawh dan tur taka a thawh theih na turin a full dose-a lak a ngai tih health official-te chuan an sawi. Mahse dose khatna la tawh zinga tam tak chuan an lak chhunzawm duh lo a ni.