Mask vuah loh vangin Thailand PM pawisa chawitir

Thailand prime minister Gen. Prayut Chan-o-cha chu mask a vuah loh avangin an ram pawisa, baht 6000(Rs 14,270) chawitir a ni.

Hri leng thawh hnihnain Thailand a luhchilh mek a, hei hian buaina tam tak a thlen chho mek a ni. Hri darh tur zel venna kawng khat atan May 1 aṭangin Thailand khua leh tui tih loh, India ram aṭanga khualzin luh a khap.

Thawhṭanni khan hri kai thar 2,048 awmin mi 8 an thi a ni. Ni li chhung a zawnin mi 2000 chuang Covid-19 hri kai hmuhchhuah ziah an ni tawh.

Thailand khawpui Bangkok-ah chuan pawn chhuahna leh midangte nena awmhonaah mask vuah vek turin thupek tihchhuah a ni. Hetih lai hian PM Gen. Prayut hi vaccine dap dan tur zawnga meeting an neihnaah mask a vuah loh avangin pawisa chawitir a ni tih Bangkok Post chuan a tarlang.

Meeting-a PM-in face mask a vuah loh vang hian Bangkok governor Aswin Kwanmuang chuan police-ah complaint a thehlut tih a Facebook post kaltlangin a sawi. Meeting-na hmuna mi dang zawngin face mask an vuah laia PM berin a lo vuah lo hi sawiselin, Bangkok Metropolitan Administration in khawpui chhunga mitinin face mask vuah vek tura dan a siam 2015 Disease Control Act,Section 51 a bawhchhia a ni, a ti.

Thai official-te face mask vuahlo chu baht 20,000(Rs 47,610) thleng chawitir theih an nih thu an sawi.