Myanmar khawchhak lamah hel leh sipaite inbei

Myanmar khawchhak lam, Thailand ramri bulah nimin zing khan Karen helpawlten Myanmar sipai outpost an bei a, sipaite nen hian an inkap zui.

Karen National Union (KNU) chuan an mi leh sate chu nimin zing, khawvar hma deuh khan Thailand rarmi bula sipai outpost beiin an la a, an camp pawh an halsak nghal niin an sawi. Ramri bula chengte pawhin an inkap thawm hi an hriat thu leh, an thil hal khute pawh an hmu a, sipai pasarih tlanchhia pawh an hmu niin an sawi. He thil thleng chungchangah hian Myanmar sipai, Tatmadaw lam chuan thuchhuah engmah an la nei lo.

February 1-a Myanmar sipaiten civil sorkar thu­neihna an hneh­chhuh hnuah khan Thailand ramri bulah hian helpawl leh sipai­te hi an inbei fo a ni. Sipaiten thla hmasaa khaw­chhhak lam ramria hel pawl nena an inbeihnaa bomb an thlak avang khan ramri chhehvel cheng, mi 3,000 chuang chu Thailand-ah an tlanchhe tawh a ni.

Myamnar helpawl ṭhenkhat chuan sipai rorelna duh lohna lantira mipui nawrh huaihawtte chu an thlawp thute an lo sawi tawh bawk. Sipai sorkar duh lohtu zinga ṭhalai eng emaw zat chuan KNU helpawl hi zawmin, training an nei mek nia sawi a ni bawk.