Tang chhuah vek an nih hma chuan Myanmar Unity sorkarin inbiakna neih duh lo

Myanmar sipaiten Parliament member an paihthlak takte leh sipai rorelna dodaltuten civil sorkar aiawhtu atana an din, National Unity Government (NUG) chuan Association of Southeast Asian Nations (ASEAN) hnenah sipaiten politics thil avanga an mi mante an chhuah vek hma chuan inbiakna neih an duh lo tih an hrilh.

Member 10 awmna, ASEAN hian Myanmar ram chhung buaina thleng mek chinfel a, tharum thawhna thlengte tihtawp a nih theih dan tur kawng a zawng a, sipai leh NUG aiawhte pawh inbe turin a ngen a ni.

NUG prime minister Mahn Winn Khaing Thann chuan inbiakna kalpui a nih hmain, sipaite chuan an mi mante an chhuah vek tur a ni tiin, chhuah tura an phut zingah hian president U Min Myint leh state counsellor Aung San Suu Kyi-te pawh an tel.

Senator-ten Myanmar sipai hrekna siam belh turin ngen

US senator ṭhenkhat chuan president Joe Biden kaihhruai sorkar chu Myan­mar sipaite chu civil sorkar an paihthlak vang leh, nawrh huaihawtte chunga rawng taka an chet avangin hrekna siam belh turin an ngen.

Myanmar hrek belh rawt­tu senator-te hian sec­re­tary of state Antony Blin­ken leh treasury secre­tary Janet Yellen-te hnenah lehkha thawnin, Myanmar mipuite an rama democracy tundin a nih leh theihna tura a beih meknaah puih dan kawng ngaihtuah tura an duh thu an sawi.

President Biden kaih­hruai US sorkar chuan in sumdawn tawnna kawngah pawh hrek se an duh thu sawiin, US energy company lian Chevron Corp (CVX.N) in Myanar Oil and Gas Enterprise (MOGE) hnena royalty a pekte titawp tura an duh thu an sawi. MOGE hi energy ministry hnuaiah a a awm a, sipai hotute chu sumin a pui ṭhin a, an zingah hian Myanmar sipai hotu lu ber genreal Min Aung Hlaing pawh a tel.