Sri Lanka cabinet-in burqa hman khap rawtna pawm

Sri Lanka cabinet chuan Muslim hmei­chhiate pawn chhuahnaa an inkhuhna, burqa hman khap rawtna chu Thawhlehni khan a pawm.

Burqa hman khap rawtna hi public security minister Sarath Weerasekera a ni a, burqa hman hi ram himna kaihhnawihah hman a him lo niin a sawi. A rawtna hi cabinet weekly meeting, Thawhlehnia neihah ngaihtuah niin an pawm ta a ni.

Cabinet-in a pawm tak avangin Attorney General Department-ah thawn a ni a, law-a chantir turin Parliament-in a pawm a ngai ve leh ang. Mahse Parliament-ah hian rorellai party hian majority a neih avangin awlsam taka an pass rin a ni.

Rawtna thlentu, minister Weerasekera chuan hmai leh taksa pum khuhna atana Muslim hmeichhia-ten an hman, burqa chu sakhaw thila kal firfiak lantirna a ni tiin, hman khap a nih chuan ram himna pawh a ṭhat phah sawt tur thu a sawi.

Sri Lanka-ah hian kum 2019 Easter Sunday-a firfiakten biak-ina bomb tipuak a, mi 260 chuangin an thih phah hnu khan burqa hman hi khap lailawk alo ni tawh bawk. Hetih lai hian Muslimte chuan burqa khap a ni hi an sawisel nasa hle thung. Sri Lanka-a cheng mi maktaduai 22 zinga 9% vel hi Muslim an ni, Buddist hi 70% chuang an awm.

UN special rapporteur on freedom of religion, Ahmed Shaheed chuan burqa hman khapna siam hi international law leh sakhaw zalenna nena inkalh a ni tiin, Pakistan ambassor Saad Khattak pawhin Muslim-te rilru a ti na dawn hle tih a sawi bawk.