Covid vaccine-in hri inkaichhawn theihna 50% in tihniam

England-a zirchianna neihah Covid-19 vaccine, Pfizer emaw AstraZeneca emaw dose vawi khat lak chuan chhungkuaa cheng ho zingah coronavirus inkaichhawn theihna 50% in a tlahniam thei tih a tarlang.

Public Health England (PHE)-in zirchianna a neih thar ber chungchang hi nimin khan tihchhuah a ni. An zirchiannaah hian vaccine la tawhin kar thum hnua hri an kai palh a nih pawhin, vaccine la velo te aiin an chenpuite an kai chhawn lehna 38%-49% vela a tlakhniam thu an sawi.

British health secretary Matt Hancock chuan, "Thuthar duhawm tak a ni, vaccine hian nunna tam tak a chhan thei tih a nemnghet a, he zirchianna hi khawvel pum huap pawmpui thei khawpa huamzau leh hri leng hlauhawm tak chhut chah nana rintlak a ni. Hei hian hri pui leng mek laka kan talchhuah theihna ṭha ber chu vaccine kan lak a, hriat loh kara midang kan kai chhawn loh hi a ni" tiin a sawi. Zirchianna chhungkua 24,000-a contact 57,000 aṭangin an nei a ni.

A hmaa zirchianna lo neih tawhah chuan Covid vaccine la tawhte hian a dose khatna an lak aṭanga kar li hnuah hri kai leh symptom lan chhuah theihna chu 65%-a a tlakhniam theih thu tarlan a lo ni tawh bawk.

Hri in kaichhawn theihna sang ber "high-risk" zingah chhung­kua hi telh niin, hei bakah hian awmhona hmun leh tan-in chu hri kai awlsam theihna a nih thu PHE zirchianna hian a tarlang.

"Vaccine hian natna kan tuar tur min chhawkin nitin nunna tam tak min chhan sak a, hei mai niloin mi dang kan kai chhawn loh nan nasa takin min pui tih kan hriat belh zel a ni", tiin PHE Head of Immunisation Mary Ramsay chuan a sawi.