Hri leng karah US-in hmalam a pan zel : President Biden

US president Joe Biden chuan US President office a luah ni 100-na thlenna tur pualin Nilaini zan khan Congress joint session hmaah thu a sawi.

President Biden chuan hripui leng karah US chuan hma lam a pan zel tih sawiin, office a luah aṭanga ni 100 chhungin mi maktaduai 1.3 chuang tan hnathawh tur an siamsak hman a, US President lo ni tawh dang zawng zawng aiin an siam hnem tih a sawi a ni.

Special package USD trillion 1.9 an siam chuan hri leng vanga an ram economy-in harsatna nasa tak a tawh siamṭhatna kawngah nasa taka puiin, economy growth rate pawh kuminah 6% chuang a nih theih phah a ni, a ti.

Biden hian minute 65 chhung thu sawiin, an rama hri leng mek dinhmun leh vaccine pek hna kalpui a nih dan bakah foreign policy chungchangte a sawilang a ni.

Kumin January 6 khan nikum President thlanna result dik tawk lo nia sawia President hlui Donald Trump-a thlawptu ṭhenkhatten buaina an siam avangin President Biden-a thusawi dawn pawh hian Capitol Building-ah venhimna khauh taka kalpui a ni.

Hei bakah hian hri leng avangin House chamber-a politician leh guest 1,600 vel an telna ṭhinah pawh mi 200 vel chauh an tel bawk. Supreme Court member pakua zingah chief justice John Roberts chauh a tel bawk.

Nilaini zana Congress joint session hmaa President Biden-a'n thu a sawi lai hian a hnung lamah vice presidetn Kamal Harris leh House of Representative Speaker Nancy Pelosi te an lo ṭhu ve bawk a, Congress-a President-in thu a sawi laia President bula hruaitu hmeichhia pahnih an inlan ṭum khatna a ni.