US-in Pfizer vaccine thawn chhuak ṭan

Ramdang ten an nawrna a nasat em avangin US chuan a nrama siam, Pfizer Covid-19 vaccine chu ram dangah a thawnchhuak ve ṭan ta.

Pfizer Inc. vaccine hi Mexi­co-ah thawnchhuah hma­sak ber niin, US plant aṭang hian vaccine ṭhahnem tak thawnchhuak turin hma an la mek a ni tih an sawi bawk.

Vaccine thawnchhuah hi Michigan-a Pfizer Kalamazoo plant-a siam niin, US president kalchhuak Donald Trump-a'n ram pawna Covid-19 vaccine thawnchhuah khapna a siam chu March thla khan tihtawp a nih tak avangin US chuan ram dang hnenah a thawn ve leh thei dawn a ni.

US sorkar chu an ram mipuite hnena vaccine pek­chhuahnaah hma an sawn chak hle a, hei vang hian US-a vaccine siamte hi ram dangah thawnchhuak turin nawrna a nasa tawh hle a ni. Hri leng hluar mekna ram tam tak chuan vaccine tam zawk an hmuh theih nan kawng an dap nasa hlawm tawh hle.

Pfizer chuan an ram mipuite vaccine mamawh ang supply chhunzawm zel a tum rualin, a vaccine dahkhawlnate tihlen a ram dang hnena thawn turin ruahmanna a siam a ni. Mexico hnenah Pfizer dose maktaduai 10 chuang thawn tawhin, ram khat hnena Covid-19 vaccine an thawn hnem ber a ni.

Pfizer leh German thawh­pui BioNTech SE te chuan European Production plant, Belgium kaltlangin ram dang hnenah vacinne hi an thawn chhuak ṭhin.

Mexico health ministry chuan Pfizer hnen aṭangin vaccine dose maktaduai hnih leh Belgium aṭangin dose maktaduai khat dawng tawhin, dose maktaduai khat dang an beisei leh mek bawk.

Pfizer chuan kum laihawl aṭangin vaccine hi kartin dose maktaduai 25 siamchhuah an in beisei a, US hnena an intiam angin July ral hma in dose maktaduai 300 pek hman a tum. Company hian 2021 chhungin vaccine dose tluklehdingawn 2.5 siam a tum a, heng zinga dose tluklehdingawn khat chu ram dang sorkar hnena pe turin inremna a siampui tawh bawk.

US vaccination campaign hi khawvela vaccine sem­chhuak rang ber pawl niin, vaccine dose maktaduai 240 dawn an pechhuak tawh a ni. Thawhṭanni khan White House chuan AstraZeneca Covid-19 vaccine dose maktaduai 60 chu ramdang ṭanpui nan a thawnchhuah tur thu a sawi.