Israel-a inpawngneknaah mi 44 an thi
Israel hmarchhak lama Mount Meron bulṭhuta Orthodox Jews festival, Lag B'Omer festival hmanga pungkhawmte zinga inpawngnekna thlengah mi 44 an thi, mi dang 150 velin hliam an tuar.
Nimin zing khan festival hmangin mi sang tel an pungkhawm a, hei hi Israel rama hripui a len hnuah sakhaw thil punkhawmna thleng lian ber a ni. Pungkhawm zinga tam takin an awmna hmun chhuahsana leiverh chep taka an kal laiin innekbuaina hi a thleng ta nia sawi a ni.
Prime minister Benjamin Netanyahu chuan festival lawmna hmuna thil thleng hi chhiatna nasa tak a ni tiin, thi chhungte a tuarpui thu a sawi.
Chhiatna thlenna hmunah hian ambulance-te tirh nghal an ni a, sipaiten chhanchhuah hna thawkin, hliam tuarte chu helicopter hmangin phurhchhuah an ni bawk.
Lag B'Omer hi Orthodox Jews-te sakhaw hun pawimawh tak niin, he festival hmang tur hian kumtin Meron hi an pan ṭhin. Festival hi ṭawngtai leh lamin an lawm a, zan lamah mei an chhep ṭhin bawk. Ningani zan khan festival hmang turin Meron hi mi 10,000 velin an thleng tawh a, nimin zing khan mi eng emaw zat an thlen belh leh bawk a ni.