Myanmar mi tam tak Thailand-ah tlanchhia

Myanmar leh Thailand inrina bulah Myanmar sipaite leh Karen helpawlte an inbeih chhunzawm zel avangin ramri chhehvela cheng, Karen hnam tam tak chu Thailand ramah an tlanchhe tawh.

Myanmar sipai leh hel­pawlte hi a hma pawhin an inkap fo a, mahse February 1-a sipaiten civil sorkar an paihthlak hnu khan an inbei leh nasa zual a ni.

UN humanitarian office chuan nimin thleng khan Myan­mar mi 56,000 vel chu Thailand ramah an tlanchhe tawh niin a sawi. UN agency chuan tualchhung buaina thleng leh hripui leng avangin Myanmar ram mipui zahve deuhthaw chu dinhmun rethei takah an ding thei dawn niin a tarlang.

Myanmar hmarlamah pawh tunhnaiah sorkar sipai leh Kachin helpawlte an inkap nia sawi a ni bawk. Mahse an inbeihnaa thi leh hliam awm zat hi hriatchian theih a ni lo a, sipai leh helpawl lamah hian thi eng emaw zat chu an awm nia sawi a ni.

Karen, Kachin leh helpawl dang eng emaw zat chuan sipai rorelna duh lohna lantira an ram khawpui hrang hranga nawrh huaihawt mekte chu an thlawp thu an lo sawi tawh a ni.