Europe-ah ni 7 chhungin Hri kai thar mtd 1.6 an awm
Covid-19 hri leng thawh hnihna chuan Europe ramte a nuai mek a, ni sarih chhungin Europe-a hri kai thar hmuh chhuah mi maktaduai 1.6 an awm hman a ni.
Europe-ah hian kar nga liam ta chhung khan Covid-19 hri kai hi an pung chak hle a, hri kai hmuh chhuah tawh hi 1,01,89,516 an awm tawh a ni. Kumin March, April leh May thla khan Europe-ah hian nitina hri kai thar zat hi mi 35,000-38,000 an awm ziah anga chhut a ni a, hemi hnu hian hri leng hian ziaawm lam a pan chho hman a ni.
US leh India-ah te Covid-19 hri a darh chhoh leh hnuah heng ramahte hi hri leng hluarna ram (epicentre) a ni zui a, Europe aṭangin epicentre hi a insawn anga ngaih a ni hman. Kumin June, July leh August thla khan Europe-a nitina hri kai thar hi mi 20,000 ai an tlem ziah anga chhut a ni.
Hri lengin ziaawm lam a pan chhoh mek avangin Europe-ah hian inkhuahkhirhna an hmante chu May thla hnu hian thlahdul chhoh a ni a, mahse September thla aṭang khan hri leng hian zual lam a pan leh a, October thlaah phei chuan Europe-a ram hrang hrangte chuan lockdown an puan bakah emergency leh inkhuahkhirhna an puan phah leh a ni. Mithiamte chuan Europe-a hri leng thawh hnihna thleng mek hi hri leng thawh khatna (hri leng hmasa) ai khan a nasa zawk niin an sawi.
Kar liam ta Ningani khan ourworldindata.org tarlan dan chuan Europe-a hri kai thar hi maktaduai 2.5 an tling hial a ni. Europe-a hri kai tawh zawng zawng mtd 10 chuang zinga mi 38,42,223 chu enkawl dam an ni tawh a, he hri thihpui tawh hi mi 2,67,674 an awm tawh bawk.