WHO hotupa Dr Tedros A in khung hrang
World Health Organization (WHO) director general, Dr Tedros Adhanom Ghebreyesus chu tunhnaiah khan Covid-19 hri kai nen an inhnimhnaih avangin a inkhunghrang mek.
Dr Tedros chuan tunhnaia Covid-19 hri kai nena an inhnimhnaih thu sawiin, WHO-in protocol (dan) a siam zawmin a inkhunghrang nghal tih a sawi. Amah chuan he hri leng natna (symptom) a neih loh thu leh a inkhungna hmun aṭanga hna a thawh chhunzawm dawn thu a sawi.
UN hnuaia health agency-ten ram hrang hrangah Covid-19 dona kawngah nasa takin hna an thawk mek a, hei vang hian UN-a hnathawk zingah pawh he hri kai an awm nual tawh a ni. WHO chuan hri laka mitinte kan fihlim theih nan kut silfai ṭhat te, hmaituam te, midang hlata awm te chu a invenna tur a nih thu a tarlang a, vaccine hmuhchhuah a nih hma chu invenna dang a la awm rih lo a ni.
WHO chuan khawtlangah hri a darh loh nan quarantine-na hmun siam turin ram hrang hrangte hri len ṭantirh aṭang khan a hriattir tawh a, hri kai nena inhnimhnaite chu khunghrang turin a ti bawk a ni.
Hri kaite ṭha taka enkawl te leh test neih tam tura a tih bakah contact tracing a rang lama ti zel turin inkaihhruaina a siamah a tarlang bawk. Dr Tedros chuan nimin khan a twitter lamah thuneitu lamin health guidance (dan) an siam chu zawm hram hram turin mipuite a ngen a, "Dan kan zawm ṭhat chuan hri inkaidarhna a titlem dawn a, hei lo hi tunah chuan kawng dang a la awm rih lo," a ti.
"WHO-a ka thawhpuite nen kan ṭangho zel dawn a, inlungrual takin nunna chhanhim kawngah leh hmun hlauhthawnawma awmte tan hna kan thawk zel dawn. He hri dona kawngah hian ram hrang hrangte, pawl hrang hrangte kan inlungruala he hri hi kan do rawn a ngai a ni," tiin Dr Tedros chuan a sawi.
Europe ram hrang hrangah Covid-19 hri leng thawh hnihna a thlen chhoh leh avangin emergency leh lockdown puang an awm chho mek a, heng zingah hian WHO headquaters awmna Switzerland khawpui Geneva-ah pawh Pathianni khan state emergency puan a ni. Bar, restaurant leh chakkhai mamawh zawrhna lo chu khar vek a ni bawk.