America-ah thla 15 chhungin Covid-19 kai mtd 62 chuang : WHO
World Health Organization palai chuan America ram bial - North, South leh Central America-ah thla 15 liamta chhung khan Covid-19 hri kai mi maktaduai 62 chuang awmin, mi maktaduai 1.5 chuangin nunna an chan tih a sawi.
"Tun dinhmunah chuan South America ramah hri kai hian pun lam panin, chung zinga damlo tam zawk te chu Intensive Care Unit (ICU) a enkawl ngai khawpin an dinhmun a ṭha lo" tiin Deputy Director of the Pan American Health Organization, Sylvian Aldighieri chuan virtual press conference a neihnaah a sawi a ni.
WHO in zirchianna an neihna kawng rukah chuan America mipuite chu Covid-19 kai leh thihpui tam berna ram niin, khawvel pum huapa hri kai hmuhchhuah 40% awmin, he hri kai zinga thihpui zat 47% an tling pha hial a ni.
Kar liam ta chhung bik khan America ramah hian hri kai hmuhchhuah thar mi maktaduai 1.4 an awm belh. Brazil chu hripui vanga thi tamna ber ram niin, kar khat chhung hian mi 17,667 in an thihpui.
Brazil health minister Marcelo Queiroga chuan thutharthehdarhtu te a kawmnaah an ram hnapui ber chu vaccine semchhuah kawnga hma lak a nih thu a sawi.
Brazil President chuan vaccine lei nan real(Brazil pawisa) tluklehdingawn thum a ruahman thu sawiin, Thawhṭanniah Covid-19 vaccine dose maktaduai 16 chuang semchhuah a tum.