Brazil President Bolsonaro thlawptute'n kawng zawh

Brazil president Jair Bolsonaro chu an rama Covid-19 hri leng a dona kawngah sawiselna nasa tawkin Senate-in a hma lak dan hi chhui a tum hial a, hetihlai kar liam ta Inrinni khan khawpui hrang hrangah mi eng emaw zatin President an thlawpna lantirin kawng an zawh.

Sao Paulo, Rio de Janerio leh Brasilia-ah mi tam tak pungkhawmin, President an thlawpna hi an lantir a ni. Pungkhawmte chuan an ramin hun khirh tak a tawh mek laiin President hian mipuite thawhpuina leh thlawpna a mamawh hle tih an sawi.

President Bolsonaro hian Covid-19 leng hi hri leng satliah tia sawiin, hri darhna tura lockdown puan a duh ngai lo. Brazil hi South America-ah hri leng tuar nasa ber ni mah se tun thlengin President hian hri leng vanga ram chhunga inkhuahkhirhna siam hi a la thlawp chuang lo a ni.

Brazil-ah hian Covid-19 vanga thi mi nuai li an chuang tawh a, US dawta hripui vanga thi tamna ber ram a ni. Hripui vanga thi zinga a zahve aia tam hi kumin chhunga thi nia sawi an ni bawk.